Amalia Cacciola

U NATALI RA VIA FILIPPINI

(Il Natale di Via Filippini)

Sciauru i crispeddhi,

u presepi

e petrali,

chistu era na vota

u nostru Natali.

Jeu e me soru

an prima matina

chi ndi sciarriaumu

a cu s’aviva a vestiri

pi prima

e me nonna

chi ndi pigghiava

chi bboni e ndi riciva i latu:

BELLI MEI, FACITI I BRAVI

CHI VI PORTU A TUTTI E DDHUI

O MERCATU.

Me nonnu chi scindiva o magazzinu chianu chianu,

tenendu a so eterna sigaretta nta manu.

Ncera aria i festa

e tanti culuri

nta ddha stradiceddha

china di sapuri.

Na randi famigghia

rispettusa assai

aundi i S.Giuvanni

non finivunu mai.

DON TOTU, DON NINU,

ME FIGGHIA SI FICI ZZITA,

HAIU A CCATTARI A RROBBA

PIRCHI’ SI MARITA.

Mi ti facivi cuggiri nu vestitu

custava nenti

e i commercianti ti trattavunu

comu nu parenti.

Na viddhana cu na vesta longa

ssittata supra i scali,

chi tiniva ova frischi

intra o so fantali.

Aviva nu sceccareddhu

tuttu ncajatu,

chi era u spassu ri picciriddhi

ru vicinatu.

C’era Ruggeru, chi ca so vuci

pariva nu tenori,

bbandiandu pisci friscu a tutti i uri:

HAIU I COZZI CHINI COMU OVA!

mentri a fila ri genti rruvava nfinu a fora.

Nu bbancuni chinu,di mmenduli,

nuci, nuciddha, mandarini e purtualli

cu na signura picciriddha cumbigghiata cu nu scialli

e sutta a seggia ndaviva nu bracieri

mi si caddhiava cu ddha calura i peri.

Frati meu,

oramai i tutti sti cosi

non c’è cchiu nenti,

nè negozi,bancuni e purtroppu

muriru tutti ddhi genti

e quandu passu

‘nta dha stradiceddha

chi na vota era accussì;

duci e tantu beddha ,

cu cori nte mani e occhi chini,

rricordu a comu era bellu

U NATALI NDA ME VIA FILIPPINI.

阿玛利亚玛丽亚·格拉齐亚Cacciola

23/12/2018